മുഖ്യമന്ത്രി പിൻ വാങ്ങിയത് പരാജയം സമ്മതിക്കൽ: പി കെ കൃഷ്ണദാസ്

Share

കണ്ണൂർ: ഒന്നാം ഘട്ട പോളിങ് കഴിഞ്ഞതോടെ മുഖ്യമന്ത്രി തിരഞ്ഞെടുപ്പ് രംഗത്തു നിന്നും രാഷ്ട്രീയ രംഗത്തു നിന്നും മുഖ്യമന്ത്രി പൂർണമായും പിൻവാങ്ങിയത് എൽ.ഡി.എഫിൻ്റെ പരാജയം സമ്മതിക്കലാണെന്ന് ബി.ജെ.പി ദേശീയ നിർവാഹക സമിതി അംഗം പി.കെ കൃഷ്ണദാസ് പറഞ്ഞു.

കണ്ണൂർ പ്രസ് ക്ളബ്ബ് നടത്തിയ തദ്ദേശപ്പോര് 2020 മുഖാമുഖം പരിപാടിയിൽ പങ്കെടുത്തു സംസാരിക്കുകയായിരുന്നു അദ്ദേഹം.നാഥനില്ലാത്ത കളരിയായും സേനാനായകനില്ലാത്ത സൈന്യമായും എൽ.ഡി.എഫ് മാറി.

ഭരണഘടനാ പദവിയിലിരിക്കുന്ന മൂന്ന് വ്യക്തികൾ കളങ്കിതരായത് കേരളത്തിന് നാണക്കേടാണ്. സ്പീക്കർ സംശയത്തിൻ്റെ നിഴലിലായത് ചരിത്രത്തിലില്ലാത്ത ഒരു കാര്യമാണ്. നിസ്സാരമല്ല ഉയർന്നിരിക്കുന്ന ആരോപണങ്ങൾ.

നവോത്ഥാന നായകനാകാൻ ആഗ്രഹിച്ച മുഖ്യമന്ത്രി ഇപ്പോൾ അധോലോക നായകനാകുകയാണ്. ദേശസുരക്ഷയുമായി ബന്ധപ്പെട്ട കേസുകളിൽ പോലും കളങ്കിതനാ യിരിക്കുന്നു കേരളത്തിൻ്റെ മുഖ്യമന്ത്രി.

ജനങ്ങളെ ഭയന്ന് ഇപ്പോൾ മുഖ്യമന്ത്രിക്ക് പുറത്തിറങ്ങാനാവാത്ത സാഹചര്യമാണ്. പ്രതിപക്ഷ നേതാവും അഴിമതിക്കേസിൽ പ്രതിയായി കളങ്കിതനായിരിക്കുന്നു. ധാർമ്മികത മാനിച്ച് ഇവരെല്ലാം അധികാരസ്ഥാനത്ത് നിന്ന് മാറി നിൽക്കണം. മന്ത്രിമാർക്കെതിരേയും ഗുരുതര ആരോപണങ്ങളാണുയർന്നിരിക്കുന്നത്. നിയമസഭ പിരിച്ചുവിട്ട് പുതിയ തിരഞ്ഞെടുപ്പിനെ നേരിടാൻ തയ്യാറാകണം.

കർഷകർക്കനുകൂലമായി കേന്ദ്ര സർക്കാർ കൊണ്ടുവന്ന നിയമത്തെ ദുർവ്യാഖ്യാനം ചെയ്യുകയാണിപ്പോൾ. ഇപ്പോൾ നടക്കുന്ന കർഷകരുടെ സമരം ഇടത്തട്ടുകാർക്ക് വേണ്ടിയുള്ളതാണ്.

ഇന്ധനവില വർധനവിനെ ചോദ്യം ചെയ്യാൻ സി.പി.എമ്മിനോ കോൺഗ്രസിനോ അവകാശമില്ല. അതുണ്ടാകണമെങ്കിൽ വില വർദ്ധനവിൻ്റെ നികുതിയാനുകൂല്യം ഉപേക്ഷിക്കാൻ അവർ ഭരിക്കുന്ന സംസ്ഥാനങ്ങളിലെ ഭരണകൂടങ്ങൾ തയ്യാറാകണം. കോൺഗ്രസും സി.പി.എമ്മും അവിശുദ്ധ ബന്ധമുണ്ടാക്കി കളിക്കുമ്പോഴാണ് കേരളത്തിൽ മുല്ലപ്പള്ളിയും വിജയരാഘവനും തമ്മിലടിക്കുന്നത്. സംബന്ധമാകാം, എന്നാൽ വേളി പറ്റില്ലെന്ന് പറയുന്നതുപോലെയാണ് ഇവർ തമ്മിലുള്ള ബന്ധം.

ജമാഅത്തെ ഇസ്ലാമിയുമായി നീക്കുപോക്കുണ്ടാക്കുമ്പോൾ ആ സംഘടനയെ നിരോധിക്കണമെന്ന് ഹൈക്കോടതിയിൽ സത്യവാങ്മൂലം നൽകിയ മുൻ ആഭ്യന്തര മന്ത്രി രമേശ് ചെന്നിത്തല തനിക്ക് തെറ്റ് പറ്റിയെന്ന് തുറന്നു പറയണമെന്നും കൃഷ്ണദാസ് ആവശ്യപ്പെട്ടു.ബി.ജെ.പി ജില്ലാ പ്രസിഡന്റ് ഹരിദാസും അദ്ദേഹത്തൊടൊപ്പമുണ്ടായിരുന്നു. പരിപാടിയിൽ പ്രസ് ക്ളബ്ബ് പ്രസിഡന്റ് എ.കെ.ഹാരിസ് അധ്യക്ഷനായി.സെക്രട്ടറി പ്രശാന്ത് പുത്തലത്ത് സ്വാഗതവും സതീശൻ നന്ദിയും പറഞ്ഞു.

Leave a Reply

Your email address will not be published. Required fields are marked *